Në mbledhjen e parë të punës pas zgjedhjeve administrative, komisioni kuvendor i Ekonomisë dhe Financave ka miratuar dje vetëm me votat e mazhorancës marrëveshjen e financimit të rrugës Tiranë-Elbasan, mes qeverisë shqiptare dhe Bankës islamike për Zhvillim. Skënder Çota, drejtor i përgjithshëm i Rrugëve, u shpreh dje në komision se projekti i rrugës Tiranë–Elbasan është i ndarë në tre lote. Ai tha se Loti i parë përfundon në kilometrin e 13 dhe është me vlerë prej 132 mln dollarë, ndërsa Loti i dytë që është tuneli dhe që ka më shumë se një muaj punime, prek vlerën e 100 mln dollarëve, kurse Loti i tretë është fundi i tunelit deri në Elbasan. Çota deklaroi se projekti në total kap shifrën e 380 mln dollarëve dhe më shumë se gjysma e projektit në fjalë financohet nga Banka islamike për Zhvillim, pjesa tjetër nga donatorë të huaj dhe vetë qeveria shqiptare. Ndërsa për tunelin punimet kanë nisur që prej një muaji, për dy lotet e tjerë pritet që punimet të nisin në fund të shtatorit. Deputetët e mazhorancës, të pranishëm në komision, e vlerësuan si shumë të rëndësishme marrëveshjen, duke e konsideruar si një nga projektet infrastrukturore më madhore. Deputetja demokrate Adriana Gjoni u shpreh gjatë mbledhjes së komisionit se rëndësia e kësaj rruge përveç të tjerash qëndron në mundësinë e zhvillimit të turizmit si lumor, malor e bregdetar të atij rajoni, duke përfshirë Elbasanin, Korçën dhe Pogradecin. Ndërsa deputeti tjetër demokrat Sherefedin Shehu e konsideroi projektin e rrugës Tiranë–Elbasan si një investim i rëndësishëm, pasi, sipas tij, me këtë kontratë shënohet financimi më i madh institucional në një investim të vetëm që bëjnë institucionet ndërkombëtare prej 20 vjetësh. Ndërkaq, sipas marrëveshjes së miratuar, termat e shlyerjes së kredisë do të jenë të tilla: ajo do të shlyhet për 20 vjet, ndërsa për 17 vjet plus tre vjet pagesë pa interesa, do të shlyhet kredia prej 222.7 mln dollarë, e marrë nga Banka islamike për Zhvillim, për ndërtimin e rrugës në fjalë. Kredia prej 222.7 milionë dollarë ofrohet nga iDB, me një maturim 17-vjeçar, plus tre vjet pa pagesë me interesa dhe norma e interesit rreth 5% në total. Rruga Tiranë–Elbasan do të ketë një gjatësi prej 26 km nga 55 km që është aktualisht dhe do të ndërtohet në kushte teknike për t'u përshkruar me një shpejtësi sa trefishi i asaj që është lejuar sot në këtë segment. Tre segmentet që do të financohen përfshijnë: segmentin rrugor nr.1, me gjatësi 13km, që fillon nga Unaza e Tiranës deri në hyrjen e tunelit, segmentin nr.2, i cili përfshin ndërtimin e dy tuneleve të ndarë dhe me dy drejtime të lëvizjes me gjatësi secila prej 2.1km dhe 2.3km dhe gjatësi mesatare prej 2.2km dhe segmentin rrugor nr.3, i cili ka gjatësi 10.8km, që fillon në daljen e tuneleve në kilometrin 15 dhe përfundon në kilometrin 26, në hyrje të qytetit të Elbasanit. Vlera totale e investimit të segmentit është 380 milionë dollarë dhe do të vijojë të ndërmjetësohet përmes iDB-së, duke kontraktuar dhe donatorë të tjerë. Projekti për rrugën Tiranë-Elbasan është cilësuar nga kryeministri Berisha, për nga rëndësia e projekteve infrastrukturore, si i dyti pas rrugës Durrës-Kukës.

Sommario

Deputetja demokrate Adriana Gjoni u shpreh gjatë mbledhjes së komisionit se rëndësia e kësaj rruge përveç të tjerash qëndron në mundësinë e zhvillimit të turizmit si lumor, malor e bregdetar të atij rajoni, duke përfshirë Elbasanin, Korçën dhe Pogradecin.

Paketa e kredisë

Shuma 222.7 milionë dollarë

Maturimi 20 vjet

Interesi 3 vite nuk paguhet

Interesi libor +3% ose (5%)

mapo.al