Filmi "Amnistia" i Bujar Alimanit, pas disa projeksionesh nëpër botë dhe tërheqjes së çmimit në Berlinale, rikthehet në atdhe mbrëmjen e nesërme për të shfaqur premirën e tij për publikun shqiptar.
Një histori dashurie, që lind gjatë rrjedhës monotone të jetës së personazheve, por që përfundon tragjikisht dhe jo ashtu siç mund ta presësh. Elsa (Luli Bitri) dhe Shpëtimi (Karafil Shena) gjejnë tek njëri-tjetri shpëtimin nga gracka e vetmisë dhe dashurohen, ndërsa presin që të dy bashkëshortët e tyre të dënuar në burg të marrin amnistinë.

"Amnistia" sjell një koncept tjetër mbi personazhet, të cilët më shumë shprehin përmes imazhit sesa tekstit. Kamera ndjek nga pas me plane të afërta personazhet, që sipas regjisorit Alimani, zbulon pa fjalë botën e tyre. “Njerëzit që kanë brenga të mëdha është e vështirë të flasin. Mbushja e syrit është më interesante se loti. Mbajtja është më e rëndësishme se eksplozioni”, tha Alimani në konferencën për shtyp të ditës së sotme.

Filmi, ngjarjet e të cilit janë vendosur në fillim të viteve '90, është një dramë neorealiste, për të cilën regjisori u shpreh se është përpjekur t'i veshë thjeshtë personazhet sipas kohës kur ata jetojnë dhe shtresës së tyre shoqërore. “Është një kinema realiste. Ndoshta nuk bëj dot një kinema tjetër”, tha Alimani, duke cilësuar imazhin dhe kamerën si një armë shumë të fortë të tijën. “Kjo përpjekje është një lloj rezistence ndaj një vrapi teknologjik. Moderimi i tepërt mund ta dëmtonte filmin", shtoi regjisori.

Regjizori tha se në vendet ku është shfaqur filmi, raportin mes dy femrave e kanë perceptuar edhe si një lidhje më intime, por për të ky nuk ka qënë synim, pasi marrëdhënia e tyre, sipas tij, është për të balancuar femrën.
Në fund filmit i vihet pikë. “Ka të bëjë me konceptin e një shtrese shqiptare që mendojnë se gjërat kanë një limit”, tha Alimani. “Amnistia” përfundon me në sfond muzikën e një gajdeje për t'i mbetur besnik, sipas regjisorit, zonës gjeografike të Pogradecit ku zhvillohet një pjesë e filmit.

Pas rreth 9 projeksionesh jashtë Shqipërisë, “Amnistia” ndër të tjera dhe me aktorët Mirela Naska, Omer Hamitaj, Orest Arapaj, etj., do të shfaqet për gati dy javë në ekranin e madh të kinemasë “Imperial”.
Filmi është fitues i tre çmime në Leçe si: Çmimi CINEUROPA 2011, Çmimi FIPRESCI, Çmimi special i jurisë. Gjithashtu ka marrë pjesë në Festivalin Ndërkombëtar në Kopenhagen, Danimarkë.

balkanweb.com