Prej datës 24 deri në 29 maj po zhvillohet në Athinë edicioni i 11-të i Festivalit Europian të Xhazit. Një aktivitet i cili ndiqet nga rreth 20 mijë spektatorë. Për herë të parë në këtë festival merrte pjesë edhe Shqipëria, ndonëse mësojmë se pjesëmarrës të tij kanë qenë gjithnjë grupe që vinin nga vende të Bashkimit Europian. Shqipëria paraqitej në këtë festival me grupin “Fanfara e Tiranës”, i cili interpretoi në ditën e parë të festivalit. Sipas gazetares Bardha Mançe, drejtuese e programit të gjuhës shqipe në Radio Internacional të Athinës, e cila u bë edhe ndërmjetëse për pjesëmarrjen e vendit tonë në këtë festival, kjo pjesëmarrje është parë me shumë interes nga publiku dhe ka pasur një jehonë të gjerë mediatike. “Në të gjitha organet e shtypit i bëhet jehonë dhe përshkruhet pjesëmarrja e grupit “Fanfara e Tiranës” për herë të parë në këtë festival, si një ngjarje e rëndësishme për prezantimin e xhazit karakteristik ballkanik”, thotë Mançe, teksa shton se ky festival është një nga ngjarjet më të rëndësishme kulturore në Greqi. Në këtë edicion marrin pjesë grupet më të famshme muzikore nga Hungaria, Sllovakia, Portugalia, Danimarka, Spanja, Austria, Holanda, Greqia, Republika Çeke, Suedia, Luksemburgu dhe Belgjika.
“Komisioni pasi shqyrtoi materialin muzikor të “Fanfara e Tiranës”, me interpretues mjaft të talentuar dhe muzikë të një niveli shumë të lartë, të entuziazmuar vendosën pjesëmarrjen e tyre në Festivalin e 11-të Europian të Muzikës Xhaz”, vijon gazetarja. Mbrëmjen e 24 majit, grupi nga Shqipëria u bë përfaqësues i vetëm i xhazit ballkanik, duke përçuar në këtë tryezë europiane ritmet e një rajoni të tërë. Kjo pjesëmarrje tanimë ka hapur një derë në pjesëmarrjen e Shqipërisë në këto aktivitete edhe në edicionet e tij të mëtejshme. Sipas Mançes, kjo ka qenë një nga arsyet e këmbënguljes për t'u përfshirë në këtë ngjarje. Sipas saj, është shumë e rëndësishme që pritësve grekë t'u tregojmë edhe vlerat e pamohueshme edhe në fushën e muzikës.

http://www.panorama.com.al