Lorik Cana është fare pranë kalimit te Lacio, madje media italiane dhe ajo turke bëjnë të ditur se shqiptari pritet të zyrtarizohet nga ora në orë si blerja më e re e klubit roman. Lacio ka arritur një akord me klubin e Gallatasarait për ta marrë Lorik Canën për një shumë prej pesë milionë eurosh. Megjithatë, kalimi do të bëhet në fillim në formë huazimi dhe Lacio do të derdhë në arkat e klubit turk një shumë prej 1.5 milionë eurosh. Më pas, Lacio do të ketë mundësi të blejë përfundimisht lojtarin dhe do të paguajë një shifër prej 3.5 milionë eurosh në qershorin e vitit 2012.
Rroga
Një problem i vazhdueshëm në bisedimet mes Lorik Canës dhe drejtuesve të Lacios ka qenë paga e futbollistit, por duket se është gjetur gjuha e përbashkët mes dy palëve. Cana përfiton rreth 2.5 milionë dollarë në vit nga kontrata që ka me Gallatasarain, ndërsa Lacio ofronte vetëm 1.7 milionë dollarë. Megjithatë, duket se ky problem është zgjidhur dhe pritet që futbollisti të firmosë zyrtarisht gjatë këtyre ditëve.
Ofertat
Klubi i Lacios ka nxituar të bindë drejtuesit e Gallatasarait për ta marrë Canën në formë huazimi, meqenëse klubet e Totenhemit dhe Shtutgartit kanë nisur seriozisht punën për të joshur lojtarin. Megjithatë, sipas asaj që raportojnë mediat turke, Cana synon të luajë patjetër në Itali. Mësohet gjithashtu se një faktor i rëndësishëm në largimin e shqiptarit nga Gallatasarai është bërë edhe trajneri Fatih Terim. “Ky i fundit ka thënë publikisht se dëshiron ta mbajë shqiptarin 27-vjeçar në ekip, por nga ana tjetër po punon nën rrogoz që të ndërtojë një skuadër me lojtarë vendës. 3-vjeçare është kontrata që i ofron Lacio mesfushorit të Kombëtares shqiptare. Ky i fundit ndërkohë, ka edhe tri vite të tjera kontratë me turqit e Gallatasarait, me të cilët firmosi verën e kaluar.

3 klube
interesohen për Lorik Canën. Shqiptari është edhe nën shënjestrën e Totenhamit e të Shtutgartit. Lorik Cana ka thënë vazhdimisht se dëshiron të qëndrojë në Stamboll, por kjo duket shumë e vështirë.

Akordi/ Darka e Lotitos me Taren

Presidenti i Lacios, Klaudio Lotito, ka darkuar dy ditë më parë me drejtorin sportiv Igli Tare dhe trajnerin Edi Reja. Treshja drejtuese e Lacios ka diskutuar për të ardhmen dhe mendohet të jetë pikërisht ai momenti kur Lotito ka dhënë miratimin që të paguhen pesë milionë euro për kartonin e Lorik Canës. Një meritë në transferimin e mesfushorit shqiptar (nëse kjo realizohet zyrtarisht) ka pa diskutim edhe Igli Tare. Ish-kapiteni i Shqipërisë ka një miqësi të madhe me mesfushorin.

http://www.panorama.com.al