Sonte, në orën 20:30, Altin Lala do të jetë titullar në ndeshjen Frajburg-Hanover

Vendimi tashmë është marrë: luftëtari i madh ka fituar… Në euro-sprintin e ditës së sotme në Frajburg (ndeshje nis në orën 20:30), Altin Lala do ta nisë ndeshjen titullar. Gjithçka është në rregull. Shqiptari “i vogël” doli i buzëqeshur nga seanca stërvitore e dy ditëve më parë.

Ai ishte pjesë e skuadrës së parë (A) në fitoren 3-1 me skuadrën e dytë (B). Pezullimi i Pintos (ka marrë numrin e nevojshëm të kartonëve për të mos luajtur në ndeshjen e radhës) i ka hapur rrugë aktivizimit të kapitenit të Shqipërisë përkrah Manuel Schmiedebach.

Ndonëse trajneri Slomka nuk dëshiron ta pohojë, Altin Lala mbetet zgjedhja e parë për të luajtur titullar ndaj Frajburgut. Për të kontrolluar topat në thellësi të mbrojtjes, Slomka u beson mbrojtësve Pogatetz dhe Hagui, ndërsa për kontrollin e mesfushës trajneri i Hanoverit ka Lalën dhe Schmiedebach. Shqiptari ka fituar “duelin” edhe me shtatshkurtrin Manu (1.70), pasi ka 2 cm më shumë (1.72).

Lala, pas 13 muajsh rigjen Frajburgun

Në fillim të marsit 2010, Altin Lala ka luajtur ndeshjen e fundit si titullar. Hanover 96 mundi 2-1 Frajburgun në betejën për të mos rënë nga kategoria. Ajo ishte fitorja e parë e trajnerit Slomka pas gjashtë humbjeve radhazi.

Sonte, futbollistët e Hanoverit nuk luajnë për mbijetesë, por për një vend në Champions League. Hanoveri kërkon të bëjë maksimumin në këtë sezon, por një gjë është e sigurt: do të luajë në kupat e Europës sezonin e ardhshëm.

Kapiteni i Shqipërisë nuk do të donte ta humbiste këtë rast, ndaj është shumë pranë rinovimit të kontratës edhe një vit me Hanoverin. Fatkeqësisht, sa i përket kombëtares shqiptare, e ka thënë disa herë: “Ky është edicioni i fundit.”

http://www.sportishqiptar.com.al/