Të hënën, ndaj Holandës, do të jetë shumë më e vështirë, pasi do të kemi disa mungesa

Shqipëri-Uzbekistan 1-0

Shqipëria: Frashëri, Peqini, Sykaj, Sallaj, Gava, Bunjaku, Vucaj, Brahimi, Vajushi, Shkurtaj, Bala (u aktivizuan: Kaçe, Osaj). Trajner: Artan Bushati

Ishte një ndeshje shumë e bukur, që e justifikon pjesëmarrjen e ekipit tonë në këtë turne. Një pjesën e parë, kuqezinjtë 21 vjeçarë luajtën shumë mirë, por edhe kundërshtarët uzbekë u kundërpërgjigjën rrezikshëm. Sidomos loja e bukur e Vajushit krijoi simpati te shikuesit në tribunën e stadiumit tërheqës austriak.

Tanët iu afruan disa herë portës kundërshtare me Shkurtajn dhe Vajushin, i cili në minutën e 25 të, pas një kombinimi model mes Balës dhe Shkurtajt, merr nje top vertikal, driblon ata që i dalin përpara, madje edhe portierin, dhe 1 0. Kundërshtarët mbesin të rrezikshëm deri në mbylljen e pjesës së parë.

Në pjesën e dytë kemi një tërheqje të tanëve dhe një rritje të lojës së uzbekëve, të cilët rrezikojnë disa herë, por në rastet vendimtare Frashëri, Sykaj, Sallaj dhe sidomos Peqini ishin në krye të detyrës. Gjithsesi, edhe në këtë pjesë loje tanët kishin rastet me të shumta e më të pastra për shënim.

Vajushi e Shkurtaj mund të shënonin gola të tjerë po të ishin treguar më të vëmendshëm. Loja u mbyll me një depërtim të bukur të Osajt në të djathtë, që i jep mundësinë e golit të dytë Vajushit, i cili, pranë portës, gjuan jo saktë.

Kujdes duhet bërë nga ekipi dhe trajneri në një harmonizim më të mirë të mesit të fushës dhe mbrojtjes, pasi në momente të caktuara u vërejtën distanca të mëdha mes reparteve. Kujdes nga Holanda, kundër së cilës do të luajmë të hënën.

Pamë ndeshjen e Holandës kundër Izraelit dhe dalluam qartë një ekip klasi, që përbëhej nga lojtarë stabël të kampionatit holandez. Aq më tepër që ekipit tonë do t'i mungojnë Roshi, Bunjaku, Brahimaj dhe Sinani.

http://www.sportishqiptar.com.al