Ambasadori amerikan në Tiranë, Arvziu promovon turizmin shqiptar. Gjatë një konference të zhvilluar dje për këtë qëllim, dy ditë përpara panairit të turizmit që do të mbahet në Pallatin e Kongreseve dhe në një periudhë fushate elektorale, ku gjasat për mungesë stabiliteti dhe efektet negative në ekonomi e mbi të gjitha në turizëm janë më të mundshme, ambasadori Arvziu deklaroi se është optimist për potencialet turistike të Shqipërisë, duke e konsideruar vendin tonë si të bekuar dhe me bukuri natyrore të pafund. “Shqiptarët janë një popull krenar për vendin dhe kulturën e tyre. Është e habitshme sa shumë shqiptarë praktikojnë gjuhë të huaja, anglisht mbi të gjitha. Turizmi shqiptar premton shumë. Mendoj që janë të shumta arsyet se përse duhet të jemi optimist, përsa i përket zhvillimit të turizmit në Shqipëri. Janë të shumta arsyet se pse duhet vizituar ky vend. Shqipëria është e bekuar me bukuri natyrore të pafund, tashmë vendi juaj është akoma më afër, e akoma më shumë pjesë e Europës dhe kjo e bën që të jetë më tërheqës për turistët europiane, dhe jo vetëm për ta, pasi Europa është në fokusin e shumë turistëve nga thuajse e gjithë bota. Në Shqipëri kanë filluar të vijnë edhe anije kroçere, një pjesë e turizmit kjo që ka filluar të zhvillohet sëfundmi. Po ashtu ju keni një aeroport, i cili po ecën shumë mirë, e me sa kam dëgjuar unë parashikohet edhe hapja e disa të tjerëve” - tha ambasadori Arvziu. Ai vlerësoi gjatë fjalës së tij se Shqiptarët janë një popull krenar për vendin dhe kulturën e tyre. “Është e habitshme sa shumë shqiptarë praktikojnë gjuhë të huaja, anglisht mbi të gjitha. Turizmi shqiptar premton shumë, por nuk mund të them që nuk ka dhe probleme e sfida që duhen kaluar. Duhet patjetër që çdo gjë të jetë e planifikuar, sidomos përsa i përket ndërtimeve në zona turistike. Gjithashtu duhet zgjidhur përfundimisht çështja e pronësisë mbi tokën, pasi pengon zhvillimin e mëtejshëm të këtij sektori”, tha ai. Ambasadori Arvziu i kërkoi qytetarëve shqiptarë që të ruajnë stabilitetin e vendit, me qëllim zhvillimin e turizmit. “Ju bëj thirrje gjithashtu që të ruani stabilitetin në vend, kjo është shumë e rëndësishme. Unë e shoh shumë të ndritur të ardhmen e turizmit shqiptar, kështu e kam menduar qe ne fillimin e eksperiencës time si ambasador në vendin tuaj “- shtoi ambasadori në fund të fjalës së tij. Ndërsa saiti prestigjoz ‘Lonely Planet’ e ka cilësuar Shqipërinë destinacionin kryesor turistik për 2011 dhe ligji për turizmin është drejt ndryshimit, pritet që treguesit për turizmin këtë vit të rriten ndjeshëm në krahasim me një vit më parë. Sektori i turizmit është shpallur edhe nga qeveria një nga prioritetet kryesore. Shoqata Shqiptare e Turizmit, ndërkohë ka nisur dhe po aplikon projektin për diferencimin cilësor të industrisë së turizmit ku turistët vendas dhe të huaj do të kenë mundësi të përzgjedhin sipas kërkesave të tyre, hotelet, restorantet dhe vendet më cilësore turistike për të pushuar.

Fonti: http://www.mapo.al/