Rritja e temperaturave javën që shkoi është bërë shkak për zbarkimin e qindra turistëve, sidomos nga Kosova në bregdetin e Durrësit. Flukse kanë pasur edhe qytetet e tjera bregdetare. Sezoni turistik mund të konsiderohet i nisur tashmë, po ngrohja e menjëhershme e motit duket se ka zënë mat shumë nga njësitë e shërbimit në qytetet bregdetare. Burimet nga dogana e Morinit në pikën e kalimit kufitar me Kosovën pohuan se, gjatë fundjavës më shumë se 15 autobusë dhe shumë mjete të vogla kanë kaluar kufirin duke iu drejtuar Durrësit në fundjavë. E njëjta situatë është konfirmuar edhe në plazh, ku kosovarët kanë nisur frekuentimet e para. Ndërsa shumë nga zotëruesit e bareve dhe restoranteve, këtë vit janë më shumë optimistë. E shtuna e dhe diela duket se ishte shumë e mbarë për ta. Shqipja, punonjëse e një restoranti që zotërohet nga kosovarë, pranë pishave të Shkëmbi i Kavajës, tha se puna tashmë për sezonin turistik ka nisur. Çka do të thotë se restoranti ka bërë gati të gjithë menynë dhe kapacitetet që kërkon një sezon turistik. Ndërsa Ibrahimi, një i moshuar nga Prizreni thotë se, në Durrës ai pushon prej 10 vjetësh dhe tashmë me ndërtimin e autostradës së re, po shfrytëzon edhe fundjavat. Si ai ka edhe shumë të tjerë nga Kosova, të cilët tani nga Prishtinë në Durrës vijnë vetëm për 2 orë e 30 minuta. Ndërsa në Durrës, situata mbetet gati e njëjta si verën e shkuar, por vetëm se, elementët e ndotjes nuk janë aq të dukshme për shkak se, fluksi i pushuesve është i ulët dhe vetëm në fundjavë. Shqipëria ishte parashikuar si destiancioni kryesor për turizmin gjatë këtij viti nga institucionet prestigjioze ndërkombëtare të kësaj linje, por ngjarjet e 21 janarit, zgjedhjet lokale dhe situata e rënduar politike e kanë zvenitur këtë parashikim. Për vitin që shkoi, ndonëse në një numër të madh, turistët sollën më pak të ardhura në ekonominë vendase se, gjatë vitit 2009. Sipas statistikave të Bankës së Shqipërisë, të ardhurat nga turizmi gjatë vitit 2010 ishin 1.2 miliardë euro, nga 1.3 miliardë euro që kishin qenë në vitin 2009, ose me një ulje rreth 100 milionë euro. Ndërsa viti 2011 e sheh në një renditje më të lartë Shqipërinë, për sa i përket sektorit të turizmit. Organizata Botërore e Turizmit e ka renditur këtë vit Shqipërinë 19 vende më lart (vendi i 71-të), në krahasim me vitin 2009 (vendi 90), vit me të cilin bëhet edhe krahasimi në raport që ka lidhje me konkurrueshmërinë për turizmin, për vitin 2011. Sipas kësaj renditjeje, e cila vlen për 139 vende, Shqipëria është kuotuar me 4.01 pikë, pas Libanit dhe përpara Republikës Dominikane, Indonezisë, Gjeorgjisë, Egjiptit e fqinjit Maqedoni. Në raportin e vitit 2011, Zvicra renditet e para, duke u pasuar nga Gjermania, e cila ka fituar një pozicion më lart e po kështu edhe Franca. Në rajonin e Ballkanit, duket se vendi më konkurrues në fushën e turizmit është Mali i Zi, i cili nga vendi i 52-të, që ka qenë në vitin 2009, është pozicionuar në vendin e 36-të. Në këtë raport thuhet se pas një periudhe të vështirë, industria e turizmit do të nisë të rimëkëmbet, por me ritme të ngadalta.

Fonti: http://www.mapo.al